Página 5 de 26

Programación SETEMBRO ’22

Publicado El 06/09/2022

En Novas, Programación

Tras unha pequena pausa de verán e unha semana de cine moi concurrida, o Cine Clube volve ao Salón García cunha nova tempada de cine clásico e moderno, sorprendente e reconfortante, hilarante e demoledor… temos para todos os gustos!

A cita comeza mañá mesmo. No marco de Festivala: mulleres creando, convidámosvos a reflexionar sobre a saúde mental das mulleres da man da escocesa Lynne Ramsay e o seu filme We need to talk about Kevin (2011). A partir da relación tortuosa dunha nai co seu fillo, exploraremos a temática da maternidade e os sentimentos de angustia, medo ou culpa que a miúdo experimentan as nais, invisibilizados nos discursos normativos e idealizados sobre o embarazo e a crianza. A entrada será de balde! Proxección: mércores 7 de setembro, 21h00.

Non vos preocupedes se esta primeira cita vos deixa mal corpo, porque a programación continúa cunha divertida sátira que nos trae a unha irreconocible Penélope Cruz, transformada desta vez en exitosa directora de cine que deberá lidiar con dous egos masculinos tan imposibles como o proxecto que ten entre mans. Benvid@s ao mundo do cine e da Competencia oficial (2021). Proxección: mércores 21 de setembro, 21h00.

Ata aquí a carteleira de setembro!

Recordade que podedes compartir a vosa opinión sobre os filmes propostos tras cada proxección a través da nosa canle de Telegram, así como enviarnos as vosas suxerencias, comentarios ou cuestións. Queremos que esta canle se converta nun espazo interactivo, participativo e horizontal para todas as persoas que forman o cine clube: vós! Para unirvos á comunidade, só tedes que premer no seguinte enlace: canle do Cine Clube Ádega.

Ademais, podedes asegurarvos unha praza reservando as entradas aquí! Vémonos no Salón García.

SEMANA DE CINE 2022!

Publicado El 22/07/2022

En Novas, Semana de Cine

O evento cinematográfico do ano volta a Vilagarcía. Do 1 ao 6 de agosto traémosche unha programación internacional do máis variada, filmes moi actuais e clasicazos que sempre paga a pena volver a ver!

Ademais, este ano quixemos centrarnos no local e no próximo, no propio e no veciño. Por iso teremos dous encontros moi especiais: o primeiro, un encontro coa escritora e cineasta galega Margarida Ledo, quen nos presentará o seu filme documental Nación, onde retrata un caso recente da loita obreira protagonizada por mulleres; no segundo invitamos aos lusos Isa Catarina Mateus e António Costa Valente, representando á Federação Portuguesa de Cineclubes e ambos con distintos cargos na Federación Internacional de Cineclubes, quen nos ofrecerán unha mostra de curtametraxes portuguesas dos últimos anos para amosarnos o que están facendo os nosos veciños do outro lado do Miño.

Por suposto, non podía faltar a música en directo acompañando un dos grandes éxitos do cine mudo, que será musicalizada pola banda Fuzzo. E todo culminará nunha gran pantalla na praia, desfrutando do solpor ao ritmo de blues.

Bótalle un ollo á programación, e non te perdas esta refrescante carteleira de verán!

Programación XUÑO

Publicado El 01/06/2022

En Novas, Programación

Este mes de xuño traémosvos un contido moi especial!

Como cada ano, o 5 de xuño é o Día Mundial do Medio Ambiente, polo que vos propoñemos un ciclo de medio ambiente con dúas películas que poñen sobre a mesa algunhas das problemáticas máis acuciantes ás que nos enfrontamos como sociedade:

Comezaremos co documental Grazas pola choiva (2017). A partir das grabacións caseiras do granxeiro keniano e protagonista do documental Kisilu Musya, esta primeira longametraxe da noruega Julia Dahr retrata os efectos devastadores do cambio climático e o necesario diálogo Norte-Sur na loita pola xustiza climática. Proxección: mércores 8 de xuño.

A segunda proposta do ciclo é a macedonia Honeyland (2019), unha cinta que evidencia o fráxil equilibrio entre a humanidade e a Natureza a través da mirada dunha recolectora de mel que habita coa súa nai dependente nun lugar inhóspito dos Balcáns. Esta historia chea de tenrura reivindica con gran maestría a ética dos coidados e a interdependencia existente entre as persoas, e entre estas e o seu entorno, ó tempo que amosa os perigos da avaricia humana. Proxección: mércores 15 de xuño.

Pero iso non é todo!

Xuño non é só un mes para pensar no planeta; é tamén un mes para festexar algunhas das conquistas sociais das últimas décadas, como é o Día do Orgullo LGTBIQ+ o 28 de xuño. Xunto coa Área de Igualdade do Concello de Vilagarcía (CIM), eliximos un filme para a ocasión que será totalmente de balde:

Dos Balcáns pasamos ó Cáucaso con Só nos queda bailar (2019), unha obra que narra o despertar (homo)sexual do seu protagonista e as dificultades coas que topará para encaixar nunha sociedade onde a heterosexualidade é a única expresión aceptada. O seu director, Levan Akin, nado sueco de pais georgianos, cuestiona aquí o peso da tradición e dos valores culturais na construcción da identidade individual, a masculinidade e o desexo. Baixo o ton cálido, a fermosura da danza e o poder visual das imaxes, nos atopamos ante un filme político que nos recorda que os dereitos individuais e a liberdade sexual non son unha realidade en todo o globo. Proxección: mércores 29 de xuño.

Como sempre, as entradas xa están a disposición aquí!

Programación MAIO

Publicado El 27/04/2022

En Novas, Programación

Do oscarizado director Ryûsuke Hamaguchi (Drive My Car, mellor película estranxeira nos Oscars 2022), este mes de maio traémosvos A ruleta da fortuna e da fantasía (2021), o seu filme anterior que tivo unha enorme acollida entre a crítica internacional. Dividida en tres historias independentes, esta obra de apariencia sinxela e dotada de asombrosa simetría estructural nos fala do azar das relacións humanas, de segredos por confesar e sentimentos non expresados que farán aflorar entre os personaxes (e o público) as emocións máis profundas. É unha cinta que non deixa de sorprender. Proxección: mércores 4 de maio.

E co motivo do Día das Letras Galegas, este ano proxectaremos A virxe Roxa de Marcos Nine, o documental que se alzou gañador do premio Mestre Mateo deste ano polo seu poderío visual e narrativo. O documental, que inclúe partes de animación, recupera a historia da ferrolá Aurora Rodríguez, muller que pasou á historia por se-la asasina de Hildegart Rodríguez, a súa propia filla, concibida por Aurora coma un experimento. Se queres saber máis sobre estas dúas mulleres non te perdas a proxección. A entrada será de balde, e o director Marcos Nine estará presente para introducir a súa obra e conversar co público. Proxección: mércores 18 de maio.

Reserva xa as túas entradas aquí!

Programación ABRIL

Publicado El 30/03/2022

En Novas, Programación

Para o mes de abril propoñémosvos dúas películas que nos achegan á realidade social dende perspectivas moi diferentes:

Seis días correntes (2021), a aclamada comedia social de Neus Ballús, introduce cun ollar amable e desprexuizado os conflitos comunicativos que poden xurdir do contacto entre inmigrantes e población local nunha situación tan cotiá como unhas obras. Proxección: mércores 6 de abril.

Pola súa banda, A última película (1971) nos fala das insatisfaccións e frustracións adolescentes nunha pequena vila de Texas nos anos 50. Esta foi a obra que consolidou a Peter Bogdanovich como director na esfera cinematográfica do momento, sendo incluso nominado ó Oscar a mellor director. Probablemente o maior éxito da súa longa traxectoria, queremos con esta película homenaxear a Bogdanovich, falecido o pasado mes de xaneiro. Proxección: mércores 20 de abril.

Podes reservar aquí as túas entradas.

Programación MARZO

Publicado El 04/03/2022

En Novas, Programación

Este mes de marzo temos programación especial con motivo do Día da Muller.

O día 9 programamos “A POETA ANALFABETA” con acceso de balde ata completar aforo, gracias a colaboración coa Área de Igualdade CIM do Concello de Vilagarcía.

Para o mércores 23 organizamos conxuntamente coa EOI de Vilagarcía unha proxeción baixo o lema “OLLADAS DE MULLER”. 6 curtametraxes feitos por directoras, correspondentes ás cinco linguas oficiais de ensino na Escola: alemán, francés, inglés, italiano e portugués, máis outro en Galego.

Podes reservar a túa entrada en neste enlace: RESERVAS

Página 5 de 26

← Anterior

Siguiente →

RESERVA DE ENTRADAS

15 noviembre 2024

A quimera

Salón García, Rúa do Alcalde Rey Daviña, Vilagarcía de Arousa, Pontevedra

RESERVA
¡No hay eventos!

Normas Covid

Revisa aquí o protocolo Covid19

Alta de Socios

Fai click aquí para descargar o formulario de alta de socio do Cine Clube Ádega.

Buzón de sugerencias

Ayúdanos a seguir creciendo y mejorando.

Pincha aquí.

Boletín de novas

Archivos

© 2024 Cine Clube Ádega & Web desarrollada por Prixma. &Aviso Legal - Política de Privacidad - Política de Cookies

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies